ابڙو اڪيڊمي Abro Academy
2020-07-23
داخلا نمبر 654
عنوان ڪَرڙو، چيڪلو
شاخ پکي
پڙهيو ويو 343
داخلا جو حوالو:
ڪَرڙو، چيڪلو
37 سينٽي ميٽر جسامت جي هن بدڪ جي نر ماد جي رنگن ۾ فرق ٿئي ٿو. سياري ۾ عام جام نظر ايندو آهي. نَر جي تتر کرڙي پٺيءَ جو مکيه رنگ سرمائي آهي. ڀوري ڇاتيءَ تي ڪارا چٽا هوندا اٿس. پَـرن تي سفيد ليڪون ۽ پُڇ جي هيٺان ھيڊو چٽو ٿئيس ٿو. اکروٽي سِسي ۽ اکين تي ڪياڙيءَ تائين چمڪدار سائو بيضوي پٽو ھوندو اٿس. ماديءَ جي پٺيءَ جو رنگ هلڪو، پر گھري رنگ جي کنڀن سان چٽڪٻرو ٿئي ٿو، ڪلهن تي چمڪدار ساون کنڀن جو چُٽو ٿئي ٿو.
نَـر پري کان وڌيڪ گهري رنگ جو نظر ايندو آهي، ويجهو وڃبو ته گهڻا خوبصورت رنگ پڌرا ٿيندا ويندا آهن. هي گاهه خور پکي آهي. ڪڏهن ڪڏهن وڏن ولرن سان ڏسبو آهي نه ته ننڍڙن گروهن ۾ هوندو آهي. ھي پکي خوف ۾ اڏامڻ دوران ۽ پاڻي تي وَٽ سٽ کائڻ ۽ گھتون گوھيون ھڻڻ ۾ ڪافي ڦُڙت ٿئي ٿو.